Про пана Лаковця

Колись то давно, дуже давно живъ въ хустскомъ замку панъ Лаковець. Его бывъ и замокъ, ёго были и села, велики маетки около замку, мавъ онъ великое богатство.

Та найбольшим у него богатством и найдорожшим скарбом были ёго жона, княгиня та ёго донька Александра.

Готовый бывъ бы панъ Лаковець зречися всего свого маєтку, всего свого богатства, только чтобы ёго жона та ёго дивчина осталися при нему. Такъ онъ ихъ предуже любив, такимъ он паном быв.

Сидивъ он тихо в своему замку, тишився своей родини, вихововав свою дивчину, учив ей говорити, Богу молитися.

Не вси паны в тых часах были такими тихими, миролюбивыми та богобойными.

Были тогды и таки паны, яки больше лаяли, чимъ Богу молилися, и не познавали границю межи своим и чужим маєтком.

Из своих замков нападали они на мирных подорожных, забирали, что у них найшли. Коли подорожных в дорози не находили, напали на села, на чужи замки, маетки, палили и рабовали, маетки и замки отъ других забирали.

Таким паном, який все на чужое лакомився, быв и пан вышковского замку.

Хоть мав он и маетки и свой замок, дуже полакомився он на замок и маетки хустского пана Лаковця. Роздумовав, чекав, коли и як бы мог то все от пана Лаковця забрати.

Прийшла нагода и на то. Пана Лаковця засягло великое нещастя. Померла ёго дорога жона, княгиня. Пан Лаковець, як свою жону заховав, дуже зажурився. Не творився ничим, ни варту до замковых ворот не ставив, ни на своих слуг, вояков не дозирав.

Дознався про се вышковский панъ. Ударивъ на хустский замок. Лаковцевое войско розогнав, замок и ёго маетки забрав. Самого пана Лаковця поклав у желизни кайданы та привязав до темной стины в подземной пивници вышковского замка.

Дивчини Александри удалося из замка утечи. Може вышковский пан про ней ани не знав, або може еи соби не пригадав.

Дивчина утекла у кирешский лис. Найшла там старого чоловика, який там в колиби жив та угля палив. До того старого чоловика она запросилася и там свой вик дале переживала. Было ей тогды вже десь до пятнадцятьлит.

Николи она старому про свой род ничого не сказала. Ани иншого много не говорила. От коли се нещастя на них прийшло, дуже сумною, мовчазливою дивчиною стала.

Раз переходили черезъ кирешский лис дроворубы. При их колиби отпочили та из старым углярем до бесиды стали.

От тыхъ дроворубов дозналася Александра, что пан Лаковець, еи отець, не помер, якъ она думала, але что еще все жие.

Хоть то життя не можно житьемъ назвати, бо страшно ёго мучать у вышковской темници. До стины ёго приковали, разъ на день дадуть му скибу чорного хлиба та горнятко гнилой воды.

Сякъ про пана Лаковця дроворубы при огни перед колибою в кирешском лиси казковали.

Александра, - кто бы быв догадався, что чому еи се так интересуе, - жваво прислуховалася ихъ бесиди.

Еще той ночи дивчина из колибы старця утекла. Пошла она просто у вышковский замок. -

Ци не потребує тутъ ктось служницю? - зазвидала отъ сторожа при воротахъ.

- Зайди въ замокъ та звидайся дале - сказавъ сторож, який пошкодовав сумну, плачучу дивчину.

Александра доти ходила в замку, что наконець приняв еи за служницю сторож той темници, въ якой еи отець мучився.

Сторожъ дуже полюбивъ свою служницю, бо была она дуже тиха, дуже послушна та дуже працьовита. Всяку роботу она честно зробила, николи отъ ничого не отгрибалася. Помагала сторожеви и до темници полоненымъ страву носити.

Отъ сего часу полегшило и пану Лаковцеви. Александра найлипши стравы, яки достала, все запрятала и крадьком свому отцеви носила. Але николи себе не зрадила. Старый Лаковець не дознався, кто его крадьком так гостит.

Минали часы. Про Александру вже многи в замку знали. Дочулися, что сторож темници яку добру, пильну и роботячу служницю мае.

Недилями и святами пополудни, коли Александра вже свою роботу докончила, часто прохожовалася она в замковой загороди и дивилася, якъ малый хлопчикъ, сынъ вышковского пана у загороди бавиться, бигае.

Одного разу той малый хлопчикъ выкрався въ загороду самъ без служници. Бигавъ дорожками, лизъ на дерева, яки стояли на берези маленького, але глубокого озера.

Александра на берези того озера под стовпами густой вербины сидила та сумовала.

Разъ лише учула, что хлопчик страшно заплакав. Подивилася Александра около себе. Малый хлопчикъ, сынъ вышсковского пана, упав из одного дерева, на якое вылиз, просто у глубокое озеро.

Никого поблизьку не было. Александра не вагалася довго, не мудровала, что то есть хлопець их найболыиого ворога, який у темници держить ей отця, але скочила в озеро, та выратовала малого хлопчика. Понесла его на своихъ рукахъ у панску палату та передала служницям. Так дознався и панъ вышковский, что из его хлопцемъ притрафилося, изъ якой небезпеки выратовала его мала служничка темничного сторожа.

Вышковский пан дуже любивъ свого хлопчика бо одна одинока у него дитина была.

Давъ прикликати перед себе малу служничку. Сказавъей:

- Проси отъ мене хоть что, хоть якое богатство, я готовый тоби хоть что подаровати за то, что ты мого хлопчика из смерти выратовала!

Дивчина сумно на него подивилася та сказала:

- Не прошу я отъ тебе богатства, подаруй ты мени только одного вязня из твоей темници.

- Котрого вязня? - зачудовався пан вышковского замка:

- Пана Лаковця, мого отця - отловила дивчина.

Сяк дознався вышковский пан, что яка служниця в сторожа его темниць служила.

Помягкло его сердце.

Выпустивъ пана Лаковця на свободу и отдавъ ему вси его маетки разом изъ хустским замком.

Отъ того часу панъ Лаковець и его вирна и розумна донька Александра жили соби дале в хустском замку в миру та в достатках.

Ти часы вже давно минули. Вже и стины хустского замка розвалилися. Але про пана Лаковця и про его доньку въ Хусти еще все говорят. Абы их имена николи не забылися, одинъ изъ лоточков, який черезъ Хуст перетикає на вични часы назвали Лаковцемъ.